د پکتیا پوهنتون علمي شورا نوبتي ناسته دائره شوه.
د پکتیا پوهنتون علمي شورا نوبتي ناسته دائره شوه.
چهارشنبه د ۱۴۴۶ کال، شوال المکرم میاشتې په ۲۵مه، چې د ۱۴۰۴ ه ش کال ثور میاشتې درېیمه سره سمون لري، د پکتیا پوهنتون علمي شورا ناسته دائره شوه.
د علمي شورا ناسته کې چې د پوهنتون مرستیالانو، پوهنځيو رئیسانو، یو شمېر څانګو آمرینو او د علمي شورا غړو استادانو برخه درلوده، پیل یې د قران پاک په څو مبارکو ایاتونو سره وشو.
لومړی د پوهنتون علمي چارو مرستیال پوهنمل عبدالله مسلم د علمي شورا ټولو برخوالو ته د ښه راغلاست او هرکلي ویلو ترڅنګ د شورا له برخوالو څخه مننه وکړه، چې په پوهنتون کې د ۱۴۰۴ تحصیلي کال پسرلني سمستر درسونه په خورا منظم شکل جریان لري.
ښاغلي مسلم همدارنګه په ټولو ټولګیو کې د سکرینونو نصب کول او ورڅخه ګټه اخیستل اړین وبلل او غوښتنه یې وکړه، چې اړوند شعبه دې د دغې موضوع د خلاصولو لپاره خپلې هڅې چټکې کړي.
علمي چارو مرستیال همدارنګه د پوهنځیو له رئیسانو څخه غوښتنه وکړه، څو د استادانو پر مکلفیتونو، دندو او چارو مالومات د علمي چارو له معاونیت سره شریک کړي.
علمي چارو مرستیال د پوهنتون له لابراتوارونو څخه استفاده اړینه وبلله او د علمي شورا برخوال یې وهڅول څو استادان دې ته واداره کړي، څو محصلینو ته په لابراتوارونو کې د عملي زده کړو په موخه ځانګړې تجربې ترسره کړي.
ورپسې د پوهنتون د علمي څېړنو مرستیال پوهندوی دوکتور عبدالوهاب حکمت په ۱۴۰۴ کال کې د افغانستان اقتصادي پرمختیا کنفرانس د دائرولو په اړه مالومات ورکړل.
همدارنګه د پکتیا پوهنتون محصلانو چارو مرستیال اصف الرحمن خپلواک د محصلانو چارو اړوند کمېټو پر ترتیب او تنظیم او د غړو پر لېستونو برابرولو مالومات د علمي شورا له غړو سره شریک کړل.
وروسته له ترتیب شوې اجنډا سره سم پر بېلا بېلو موضوعاتو لکه: د پوهنځیو، معاونیتونو او کمېټو پر پلانونو، د یو شمېر څانګو د چارو پر انسجام، د استادانو د تقرر او ترفېعاتو په دوسیو او یو شمېر نورو موضوعاتو بحث وشو او په اړه یې لازم تصامیم هم ونیول شول.
