د ۱۴۰۱ ه ش کال، حمل۲۱ مه، پکتیا پوهنتون
د ۱۴۰۱ ه ش کال، حمل۲۱ مه، پکتیا پوهنتون
د پکتیا پوهنتون له ادبیاتو پوهنځي څخه په لسګونو تنه زده کړيالان فارغ شول.
په دې مناسبت د پکتیا پوهنتون عمومي جمنازیوم کې جوړ شوي مراسم چې مرستیال والي شیخ عزیزالرحمن منصور، د پوهنتون رئیس پوهنمل عبید الله اخندزاده، محصلانو چارو مرستیال پوهنمل نقیب الله ځاځي، پوهنځیو رئیسانو، استادانو، محصلینو او راغلو میلمنو پکې برخه درلوده، پیل یې د قرانکریم په څو مبارکو ایاتونو وشو.
وروسته د ژبو او ادبیاتو پوهنځي رئیس پوهنیار رحیم الله داوودزي ګډونوالو ته د ښه راغلاست وینا وکړه او له راغلو میلمنو څخه یې مننه وکړه، چې له دوی سره یې د فراغت په ویاړ جوړه شوې ناسته کې برخه اخیستي.
پوهنتون رئیس پوهنمل عبیدالله اخندزاده ناستې ته په خپلو خبرو کې د زده کړیالانو پر مسؤلیت بحث وکړ او په وینا یې فارغ شویو ټولو زده کړیالانو ته په کار دي، چې د خپل علم او پوهې په برکت سره د دین، خاورې او ولس خدمت خپله اصلي دنده وګڼي.
د پکتیا مرستیال والي شیخ عزیز الرحمن منصور په خپلو خبرو کې فارغ شویو محصلینو ته په خطاب کې وویل د وطن ابادي په تاسو پوري اړه لري او هیڅکله د دښمن د بې ځایه تبلیغاتو ښکار نشئ.
ښاغلي منصور په خپلو خبرو کې زیاته کړه، نړیوال مو د وسلې په زور مات کړل او اوس به د علم او پوهې په اساس خپلې خاورې او ولس ته خدمت کوو.
د یادونې وړ ده، چې د پکتیا پوهنتون ادبیاتو پوهنځي له څلور څانګو پښتو، دري، انګلیسي او ژورنالیزم څخه ټول ټال ۲۰۵ تنه زده کړیالان فارغ او ټولنې ته د خدمت په موخه وړاندې شول.
ناسته د اختتامیه دعا په ویلو سره پای ته ورسېده.
د نشراتو او عامه اړیکو عمومي مدیریت
